ئه‌ڕا هاوڕێ هه‌نینم شه‌بنه‌م

تا مانگ له شه‌و داره‌لؤس بوو

تا په‌ڵنگێ له شوون ئاهوو

تا بمینێ پرشنگ خوه‌ر

تاگه‌ر دارێ له داڵاهوو

تا سێف سؤر ده‌رده‌داره

تا چه‌رخ چه‌رخێ له‌ی مه‌داره

تا مار و مه‌ێو هاوباوشن

دڵ ئاویته‌ێ مه‌ی و ژاره

تا ماسی له ده‌ریا وسێ

ته‌نیا له لاێ ته‌نیا وسێ

له به‌رزیی په‌ژاره‌یلم

خه‌ێاڵ تۆ وریا وسێ

تۆ خاكی و ئاو و ئاگر

په‌رده لا ده‌ر په‌رده داگر

من ته‌نیا شێـعر ده‌سڵاتمه

ئه‌ێ ك خه‌مت شاێ دنیاگر

تا كه‌شكه‌شان هه‌زاره‌ێه

تا شه‌و هه‌ر شه‌و شه‌واره‌ێه

دڵ هه‌ر كه‌فێ له چاێ ئه‌نوو

گیسیا مه‌پرس چه چاره‌ێه‌!